Ұлы суреткер М. Әуезовтің жолы ауырлау болған, саяси небір науқандарға байланысты ең алдымен Мәскеуде, орыс тілінде жарық көрген соң барып төл оқырманымен қауышқан туындысы «Қилы заман» театрымызда алғаш рет 1997 жылы қойылған болатын. Тарих сабақтары ұмытылмауы керек, тарих сабақтастығы үзілмеуі керек.
1916 жылғы ұлт-азаттық көтерілісінің, атап айтқанда Қарқара көтерілісінің тарихи баянын негізге ала отырып, халыққа жасалған қиянаттың түп себебіне үңілетін; патшаның қазақ азаматтарын қара жұмысқа алу туралы жарлығына, отаршылдық саясат, зорлық-зомбылыққа қарсы шыққан елдің кешегісі мен бүгінін зерделеуге бастайтын жаңа қойылымның ең басты идеясы – рухыңды жоғалтпа, әлеумет! Рухың жоғалса – елдігіңнің жоғалғаны.