Бүгінгі таңда нәпсісін тыйғанды – қор, нәпсісі билегенді – зор деген түсінік белең алып барады. Тарихта да ақылдыдан гөрі бай мен бағланның айтқаны болған. Режиссердің пікірінше, бұл – қауіпті жағдай. Сондықтан да ақылдыны, көзқарақтыны тыңдайтын заман орнауы, ақылдылардың заманы келуі керек.
«Мен ішпеген у бар ма?» драмасының жаңа қойылымы Абай мен Құнанбай, әке мен бала, ұрпақ пен ұрпақ арасындағы күрделі қарым-қатынастарды интерпретациялау арқылы осы мәселе төңірегінде ой қозғайды. Біздің театрда алғаш рет 1987 жылы қойылған бұл драманың жаңа нұсқасы: Құнанбай – ірі тұлға дей тұрғанда, Абай жолы – иман жолы, білім жолы, өркениет жолы, халықтың болашақ жолы, мәңгілік үлгі етер жол дегенді меңзейді.