А.П. Чехов – дүниежүзінде ең көп сахналанған драматургтардың бірі. Бұл – оның «Апалы-сіңлілі үшеу» драмасының қазақ театрында алғаш рет қойылуы.
Драма оқиғасы губерндік қалада, зиялылар отбасы Прозоровтардың үйінде өтеді. Андрейдің қарындастары, апалы-сіңлілі үшеу: Ольга, Ирина және Машаның бар арманы, басты арманы – өздері туып-өскен Мәскеуге оралу. Бірақ олар қанша орайы келіп тұрса да кетіп болмайды. Бір кездері Мәскеу университетінің профессоры болады деп үміт еткен ағалары болса отбасының билігін қолына алған әйелі Наташаға жалтақтайды.
Драманың бүкіл оқиғасы Прозоровтардың және арман жетегіндегі, бірақ оның жүзеге асуы үшін шөптің басын да сындырмайтын, ерік-жігері аз, қиялмен күн өткізген өзге де кейіпкерлердің тыныс-тіршілігі мен бір-біріне онша үйлесімі жоқ, шым-шытырық қарым-қатынастары аясында өрбиді. Әр кейіпкердің өз драмасы және ол драманың бірнеше астар-ағыны бар...