БАҚ біз туралы

Махаббат пен ғадауат

М.Әуезов атындағы Қазақ мемлекеттік академиялық драма театрында У.Шекспирдің «Король Лир» пьесасы желісінің негізінде «Лир патша» қойылымы сахналанды. У.Шекспирдің атақты трагедиясын қазақ тіліне тәржімалаған Әбіш Кекілбаев болатын.
Жаңа қойылымның көрер­менін бірден өзіне тартып, бау­рап алуы аударманың құнар­лылығында болса керек. Аз сөзге көп мағына сыйғызып, жүрекпен үндесіп жататын қойылымның кейіпкерлерін сомдау да іскерлік пен туа бітті талантты қажет ететіні даусыз. Лир патшаның рөлін Қазақстанның еңбек сіңірген қайраткері Дулыға Ақмолда шебер сомдады. Актердің шеберлігі сонда, көрерменін кейіпкерінің іс-әрекетіне сендіріп қана қоймай, бүгінгі қоғаммен астасып жатқан адамдардың арасындағы қарым-қатынасты шынайы жеткізіп, жүрек тебірентті.
Қойылым бастан-аяқ отбасын­дағы тәрбиемен үндесіп жатады. Бақталастық, ұрпақтар арасын­дағы қарама-қайшылық, яғни әке мен бала қарым-қатынасы төңірегінде өрбиді. Бүкіл елін ашса алақанында, жұмса жұдырығында ұстаған Лир патшаның өмірінің соңы осылай болатынын кім ойлаған?.. Адам бойындағы махаббат пен ғадауат, адалдық пен ашкөздік тайталасы кімді де болса ойландырып, мына жалған өмірде адамгершілік қағидаттары алдыңғы орынға шығады. Сал­қынқанды зерделенетін қойы­лымнан көрерменнің өн бойын мазасыздық билеп, сан сауал арқалап қайтады.
Қойылымнан бүкіл ұжымның еңбегін көруге болады. Трагедияның сахналық нұсқасын жазған М.Омарова, қоюшы режиссері Е.Нұрсұлтан, қоюшы суретшісі Т.Есімбаев, музыкамен көркемдеуші Е.Есен­баев, режиссердің көмекшісі С.Гениярова еңбектенген қойы­лым өзінің діттеген мақсатына толық жетті деуге негіз бар.
Лир патшаның қыздарының рөлін театрдың жас артистері Әсел Сайлауова (Гонерилья), Жанаргүл Жаныаманова (Регана), Динара Үсенова (Корделия), ал Кент бейнесін Ермек Бектесов сомдады. Қай кейіп­керді алсақ та оның рөлін бере білген артистердің шеберлігіне, жан дүниесінің тереңдігіне сүйсінесің. Әпкелі-сіңлілі Гоне­рилья мен Регананың арасын­дағы бәсекелестік, әпке­сінің сіңлісіне у беріп өлтіруі, қарттық шағында өмірдің көлең­келі тұс­тарына тап болған Лир патшаның қыздарына деген махаббаты, т.с.с. бір сөзбен айтып жет­кізу мүм­кін емес тұстары же­тер­лік. Әр кейіпкердің өзіне тән өмірі, тағдыры, мінез-құлқы бар.
Бір сөзбен айтқанда, көрер­меніне ой салып, рухани байы­тып, тіпті өткен өмірін еске тү­сіртіп, болашағына бейжай қара­мауға жетелейтін, сол арқылы адамдық пен мінез-құлықтың үйлесімділігін, ақ пен қараны ажыратып, биікке шығар тұсын меңзейтін қойылымның үлкен-кішіге берері мол.

Бағдагүл Балаубаева

"Ана тілі" газеті.