БАҚ біз туралы

ТҮЛЕКТЕР ТЕАТР АШТЫ

Аты аңызға айналған актер, қазақ театр және кино өнерінде ізін қалдырған тұлға, КСРО халық артисі, Қазақстанның Еңбек Ері Асанәлі Әшімовтың шәкірттері бас құрап, өнер әлеміне қадам басуға талпыныс жасапты. Мұхтар Әуезов атындағы Қазақ мемлекеттік академиялық драма театрының кіші залында жас театрдың таныстырылым рәсімі өтті.
Бір ұжым аясында бірігіп, өнер әлеміне қанат қағып жатқан 30 жас түлек – 2014-2018 жылдары Темірбек Жүргенов атын­дағы Қазақ ұлттық өнер академиясының «Театр өнері» факультетінде, Асанәлі Әші­мов шеберханасында білім алған. Олар театр сахнасына тың серпінмен, жаңа­ша бағытпен қадам басып, көрерменге жаңа­шыл ойларымен жарқын қойылымдар ұсын­бақшы. Түлектердің бірінші ұстазы – аңыз Асанәлінің өзі болса, екінші ұстаз – режиссер Талғат Кубеков. Таныстыру салтанатынан кейін жас театр­дың алғаш сахналағаны – «Қарагөз» тра­гедиясы болды. Одан кейін «Арыс­тан­дар патшалығы» мен «Соңғы қоңырау» поэтикалық драмасын көпшілік назарына ұсынды.
– Кейбіреулер актердің жұмысы оңай деп ойлайды. Бірақ олар қателеседі. Актер сахнаға шыққан сайын, дайын­дал­ған сайын шыныға түседі. Жетістікке жету оңай емес. Оған дейін ұзақ жолды өткеріп, та­лай сынға төзуге ту­ра келеді. Шә­кірт­те­рім­нің барлығы сол ұзақ­ жолға дайын. Олардың бәрі – жұмысқа зе­рек балалар. Жалпы, шәкіртті бірінші курстан бастап қолға алмасаң, кейін дамы­та алмай қалуың мүмкін. Осылардың әр­қай­сысы 1-курстан бері 10 роман оқыды. Ой­лары, түсінігі, із­денімпаздығын салыс­тыр­сақ, 4 жыл ішін­де адам айтарлықтай өзгерді, – деген ха­лық артисі шә­­кірттеріне сенетінін айт­ты.
Сөз арасында Асанәлі Әшімов әр жылы бі­­тір­ген студенттерден труппа жасау керек де­г­ен ұсынысты жоғары жаққа жол­да­ған­да­­рын да жеткізді. Сонда ғана нәтиже шығады дейді.
– Биыл 1-курсқа 40 бала түсті. Драма жә­не кино актері мамандығында оқиды. Бұл балалар күніне 12-14 сағат жұмыс іс­тей­ді. Еңбек қана табысқа жеткізеді. Құр­мет­ті көрермен қауым, барлығы өздеріңіз үшін. Өнердің негізгі мақсаты – сіздерді қуан­ту, көңілге жайлылық сыйлау. Сіздерге эсте­тикалық тағылым бере алсақ, біздің мақ­саттың орындалғаны, – деп пікір біл­дір­ді. Театр корифейінің бұл ыстық лебізіне ри­за болған көпшілік қол соғып, қошемет көр­сетті. Асанәлі Әшімов театры­ның ғұ­мы­ры бе­рекелі, берері мол болғай.

Абай АЙМАҒАМБЕТ, Алматы қаласы

https://aikyn.kz/2018/10/16/70647.html