СМИ о нас

Қайран қалдырған Қожанасыр

Түркі халықтарына ортақ кейіпкер Қожанасырдың сахнадағы бейнесі көрерменге күлкі сыйлай отырып, қоғамның кейбір ащы тұсын әжуамен дөп басқан. Бес жылдан бері бар қазаққа тамаша көңіл күй сыйлап келе жатқан музыкалық комедияны алғаш рет көрушілердің қатары бүгін де көп болды. Қожанасыр мен басқа да кейіпкерлердің рөліне қайран қалған көрерменнің ойын білмек болғанбыз. Қалың көпшілік арасынан сазгер, әнші Арман Дүйсеновті көзіміз шалған болатын. 
Арман Дүйсенов, әнші-сазгер:
 – “Қожанасыр тірі екен” қойылымын алғаш рет көруім. Жұбайыммен, екі баламмен спектакльді тамашаладық. Өте жақсы, көңілімізден шықты. Комедия арқылы астарлы ойын драматург шебер жеткізген. Режиссерлік шешім де әдемі, оны көрерменге ұсынған әртістердің де өнері тамаша. Бекжан ағамыздың шеберлігіне қашан да тәнтіміз. Жалпы түрік халықтарының мәдени ынтымақтастығы, Мұстафа Кемал Ататүріктің сөзімен айтқанда тарихының, дінінің, әдет-ғұрпының тұтастығы идеологиясы қойылымның негізгі мазмұнында баяндалған. Осыны залдағы көрермен терең түсінді деп ойлаймын. Комедия – сондай дүниелерді жеткізудің жақсы тәсілі. Ұмытылып бара жатқан тарихты насихаттауымыз керек, кез келген адамның қолынан келе бермесе де халыққа жеткізу міндетіміз деп есептеймін.
Семей Мекен, Алматы технологиялар университетінің студенті:
-Біз бос уақытымызды мұражайға, осындай қойылымдарға арнаймыз. Әсіресе, М.Әуезов театрына құрбыларыммен жиі келіп тұрамын. Аталған қойылымды алғаш рет көріп, тамаша әсермен шықтық. Бекжан ағаның ойыны қатты ұнады. Негізінен Бекжан Тұрыс – сүйікті актерім, оның бүгінгі рөлі де ерекше әсер етті.
Дайындаған: Е.Назарұлы