БАҚ біз туралы

ТАЛДЫҚОРҒАНДАҒЫ ТАҢҒАЖАЙЫП ТЕАТР

Алматы облысының орталығында апта бойы Орталық Азия елдерінің «Қазақстан – Еуразияның жүрегі» атты VII халықаралық театр фестивалі өтеді. Астананың 20 жылдығы мен қазақ көркемөнерінің өркендеуіне өлшеусіз үлес қосқан мемлекет және қоғам қайраткері Темірбек Жүргеновтің туғанына 120 жыл толуына орайластырылып ұйымдастырылған театр фестивалі Талдықорғанда жаңадан салынған 510 орындық таңғажайып театрдың ашылуымен тұспа-тұс келді.
Таңертеңгісін журналистер үйінде ұйымдастырылған баспасөз мәслиха­тына келген қазақ кино және театр өнерінің тарланы, мемлекеттік сый­лықтың иегері, Қазақстанның халық әртісі, Еңбек Ері Асанәлі Әшімов пен Алматыдағы Мұхтар Әуезов атындағы Қазақ академиялық драма театрының директоры Асхат Маеме­ров, Талды­қорғандағы Бикен Римова дра­ма театрының директоры Ғалия Темір­бае­ва журналистерге театр фестивалі жайлы әңгі­мелеп берді. – Халықаралық фестивальдің мақсаты – театр өнерін халыққа кеңінен насихаттау және Орта Азия елдеріндегі өнер ұжым­да­ры­­ның өзара ынтымақтастығын арттырып, тә­жірибе алмасуын қамтамасыз ету. Мәрте­­белі халықаралық шара үшін Талды­қор­ған бекер таңдалған жоқ. Алматы облы­сындағы Бикен Римова атындағы драма театрдың бүгінге дейін жеткен жетіс­тіктері баршылық. Облыс басшы­лы­ғы­ның көркемөнерге деген қамқорлығы ерекше. Осыдан екі жыл бұрын жаңа драма театр ғимара­тының қазығын қағуға қатыс­қан едім. Енді, міне, жаңа театрдың ашы­луы­на келіп отырмын. Жаңалықтың халық­аралық фестивальге, қазақ өнерінің, оның ішінде театр өнерінің дамуына үлкен еңбек сіңірген, бастауында тұрған Темірбек Жүргеновтың 120 жылдығына орайлас келуі де бекер емес, – деді баспасөз мәсли­хаты­ның беташар сөзінде Асанәлі Әшімов.
Мұхтар Әуезов атындағы драма театр­дың директоры Асхат Маемеров пен Талдықорғандағы Бикен Римова атындағы драма театрының дирек­торы Ғалия Темірбаева халықаралық театр фестивалі жайлы жан-жақты айт­ты. Қандай өнер ұжымдарының кел­генін, қойылымдардың қашан, қай уақытта болатынын, оларға кірудің тегін екенін жұртшылыққа жеткі­зуді өтінді.
Түстен кейін Бикен Римова атын­дағы драма театрдың шаңырағынан шуақ шашылған аса сәулетті жаңа ғимараты ашылды. Жаңа шағын аудандағы соңғы жылдары салынған, бірінен-бірі өтетін нысандардың ортасында оқшауланып тұр­ған драма театр алдындағы алаңға жинал­ған халықта есеп жоқ. Жаңалықтан алдын ала құлағдар болған талдықорған­дық­тар мен қонақтар түгел осы маңда жүр. Көпшілік асыға күткен салтанатты шақ та басталды. Бірінші болып сөз алған Алматы облысының әкімі Амандық Баталов жи­нал­ғандарды Талдықорғандағы таңға­жайып театр­дың пайдалануға берілуімен құттық­тады.
 – Өздеріңіз білесіздер, Мемлекет басшы­сы Талдықорғанға келген кездерінде облыс орталығының алға жылжыған жыл­дар­мен бірге көркейіп, келбеттеніп келе жат­қанына оң баға беріп кететін. Сол ұмы­тыл­мас жүз­де­су­лер барысында біздің әрбір қада­мымызды құптап, қолдау көрсе­те­тін. Бүгін ашылып отырған театр ғима­ра­ты да Елбасының мақұлдауы мен қол­да­уы арқасында дүниеге келді. Енді біз жаңа әрі ерекше театрымызбен мақта­на­тын боламыз. Рухани жаңғыру театр өне­рі­н­ен басталады десем, артық айтқандық бола қоймас. Қуаныш­тарыңыз құтты бол­сын. Бүгінге дейін жеткен биіктері біраз болған драма театрымыз алдағы кезде де толайым табыстармен қуантатын­ды­ғына се­немін, – деген облыс басшысы өңірдің өсіп-өркеюіне де тоқтала кетті.
Асанәлі ағамыз бастаған қонақтар да өздерінің тілектері мен құттық­тауларын жеткізді. Содан соң құрметті қонақтар мен фестивальге қатысушы театрлар ұжымда­ры қызыл кілем арқылы өтіп, театр табал­ды­рығын аттады. Сәні мен салтанаты келіс­кен театр сахнасына көтерілген, ара­сын­да Асанәлі Әшімов, Талғат Теменов сынды атақтарынан ат үркетін өнер тар­ландары өздерінің лебіздерін білдірді. Сол жерде биылғы «Серпер» жастар сыйлы­ғының иегерлеріне марапаттары тапсы­рыл­ды.
Жаңа театрдың шымылдығы Мұхтар Әуезовтың «Айман – Шолпан» драмалық комедиясымен ашылды. Аптадан астам уақыт­қа созылатын халықаралық фестива­ль барысында талдықорғандықтар жаңа театр сахнасынан Қазақстан, Қырғызстан, Түрікменстан, Өзбекстан, Түркия елдері­нің театрларының қойылым­дарын тама­ша­лай алады.

Болат АБАҒАН,

Алматы облысы

https://aikyn.kz/2018/11/02/72113.html