БАҚ біз туралы

ОРТА АЗИЯ ТЕАТРЛАРЫ – ТАЛДЫҚОРҒАНДА

Мәдениет және спорт министрлігінің қолдауымен Қазақстан Театрлары ассоциациясы 2018 жылдың 30 қазан – 6 қараша айлары аралығында Талдықорған қаласында Астананың 20 жылдығы мен көрнекті мемлекет қайраткері Темірбек Жүргеновтің 120 жылдығына арналған VII Орталық Азия елдерінің халықаралық фестивалін өткізеді.
Фестивальге бақ сынауға Қа­зақстан, Қырғызстан,Түркіменстан, Башқұртстан, Өзбекстан, Түркия елдерінің театрлары қатысады. Мәдени шара Орталық Азия елдері мен Қазақстанның театр өнері саласындағы әріптестікті нығайту, театр өнерін дамыту және осы сала мамандарын шығармашылық бастама­ларға ынталандыру, сондай-ақ жұрт­шылықтың назарын театр үрдісінің жаңа, заманауи үлгілеріне аудару мақ­сатында өткізіледі.
Бүгін шымылдығы ашылған фести­вальде аталған 6 мемлекеттің бас театрларының 11 қойылымы көрермен назарына ұсынылады. Алдымен Б.Римова атындағы Талдықорған драма театры «Айман-Шолпанды» қояды. Сәрсенбіде «Дариға-ай» жастар театры «Ричард III» қойылымын ұсынып, артынша мамандар талқы өткізеді. Фестивальдың артықшылығы да сол – талдау жасалып, кем-кетік пен артықшылықтар айшықталады.
1 қарашада «Қазақстан мен Орта Азиядағы білім беруді, мәдениетті және өнерді ұлттық сананың кемелденуіндегі бірегей тәжірибе ретінде жаңғырту» атты халықаралық ғылыми-практикалық конференция өтіп, кешке көрермен «Театр-28» ұжымының «Войцек» қойылымын тамашалайды. Жұмада күндіз Алп Арслан атындағы Түркімен Ұлттық жастар театры «Көроғлы және Агаю­нусты», кешке ресейлік М.Гафури атындағы Башқұрт мемлекеттік ака­демиялық драма театры «Іздеп таптым сені…» қойылымын тарту етеді.
Сенбі күні Түркия республикасынан келген Хасан Ажар өндірістік театрының ұжымы «Пирайе» атты пьесаны көпшілікке ұсынады. Осы күні кешке Б.Қыдыкеева атындағы Қырғыз Мемлекеттік жасөспірімдер театрының актерлері «Қасқыр ұлыған түнді» сахналайды. «Ана – Жер – Ана» қойы­лымын Өзбекстанның Сырдария облыстық музыкалық драма театры актерлерінің орындауында көре ала­мыз. Жексенбіні осы спектакльмен бастап, артынша Н.Бекежанов атын­дағы Қызылорда облыстық қазақ музыкалық драма театры ұжымы ұсынған «Нарком Жүргеновты» тама­шалауға болады.
5 қараша күні С.Мұқанов атындағы Солтүстік Қазақстан облыстық Қазақ музыкалық драма театры «Қарагөзді», елордалық Қ.Қуанышбаев атындағы Мемлекеттік академиялық қазақ музыкалық драма театры «Қорған­сыздың күнін» сахналайды. Сей­сенбіде, яғни 6 қарашада фестивальдің жабылу салтанаты өтеді. Айта кетейік, аталмыш фестиваль Бикен Римова атындағы Талдықорған драма театры­ның жаңа және ескі ғимара­тында өтеді. Қойылымдарды Талдықорған қаласының тұрғындары мен қонақтары тегін тамашалай алады.

Айша ЕРСҰЛТАН