БАҚ біз туралы

Әуезов театрының 96-маусымы Қазақ драматургия ордасының жаңа маусымы «Абай» спектаклімен ашылды.

 Баспасөз мәслихатына М. Әуезов атындағы Қазақ ұлттық драма театрының директоры, Қазақстанның еңбек сіңірген қайраткері Е. Жуасбек, Қазақстанның еңбек сіңірген қайраткері Ә. Рахимов, Қазақстанның еңбек сіңірген қайраткері А. Кәкішева, Қазақстанның еңбек сіңірген қайраткері Б. Тұрыс, режиссер А. Оспанбаева    қатысты.

Өз сөзінде театр басшысы Еркін Жуасбек:  «Спектакль дегеніміз – тірі организм. Қандай туынды болмасын ол жаңа дүние. Ең бастысы оның айтары бүгінгінің шындығы болуы керек. Осы тұрғыдан алғанда біз осы маусымда көрерменге екі жаңа спектакль ұсынғалы отырмыз. Оның бірі – «Қан мен тер».
 Өткен ғасырда қазақ театр өнерінің бөлшегіне айналған үлкен спектакль болған. Біз осы пьесаға оралып, «Қан мен тер. Ақбала» деген атпен көрсеткелі отырмыз. Ол кездегі бас кейіпкер – Еламан. Біз әйел мәселесін көтеріп, Ақбаланың образын жасап, жаңа дүние көрсетпекпіз. Бұл үлкен психологиялық драма болады деген үміттеміз» деді. Сондай-ақ театр директоры Е. Жуасбек көрермендерді қарашаңырақ өнер ордасының 96-маусымының ашылуымен құттықтап, алдағы жоспарлармен бөлісті. Сонымен бірге көрермендер назарына театрдың қырық жылдық тарихынан сыр шертетін «Сахна сәттері» көрмесі ұсынылды. Көрме барысында белгілі фотограф Қалиғұмар Қабдешев өз фотоальбомын театрға сыйға тартты.

Қазақ өнеріндегі жаңашыл бағыттар жайлы сұрағымызға Бекжан Тұрыс: « Кез келген ұлттың өнері өзі үшін қажет. Әрбір ұлт өткенін қадірлеп, бүгінгіге толғанып, ертеңінің қамын жеп отыруы керек. М. Әуезов театры ұлттық өнердің қара шаңырағы және ұлттық академиялық театр болғаннан кейін театр ұлттық мүдде жайлы бағытынан жаңылмауы керек деп ойлаймын. Театрымызда эксперименттер жасауға «Кіші залымыз» бар. Жаңалық жасаймыз деп жаңылып жатқандар көп. Театр өзінің көркем өнерін ұстап қалуы үшін классикалық туындылар болсын, М.Әуезов, Қ.Ысқақ, О.Бөкей болсын, бұндай ұлы шығармалар біздің театрға қажет дүниелер» деп жауап берді.

https://qazdauiri.kz/news/auezov-teatrynyn-96-mausymy